Biocruces Bizkaia hautatu du Carlos III.a Institutuak CombiVacS azterketan parte hartzeko. Azterketa hori Osakidetzaren ikerketa-institutuen laguntzarekin garatuko da.

Carlos III.a Osasun Institutuak, Espainiako Medikamentuen eta Osasun Produktuen Agentziaren (AEMPS) eta Osasun Ministerioaren oniritziarekin, sustatu duen saiakuntza klinikoaren helburua da ebaluatzea organismoak nola erantzuten dion profil desberdineko txertoen konbinazioari: adenobirus (AstraZeneca) eta RNA mezularia (Pfizer). Biocruces Bizkaiarekin batera, Estatuko beste lau zentro aukeratu dituzte saiakuntza hori egiteko: Bartzelonako Vall d’Hebron eta Clinic Barcelona ospitaleak, eta Madrilgo La Paz eta Clinico San Carlos ospitaleak.

CombiVacS saiakuntza klinikoa datorren astean jarriko da abian. Saiakuntza horren bidez, jakin nahi da AstraZeneca txertoaren lehen dosia jaso duten pertsonei gero Pfizer txertoaren dosi bat eman ondoren organismoak nola erantzuten duen, bai segurtasunari dagokionez, bai immunitate-sistema aktibatzeko gaitasunari dagokionez, bai immunitate-erantzuna sortzeari dagokionez. Azterketa hori 18 urtetik gorako boluntario osasuntsuei, osasun egonkorra dutenei eta haurdun ez dauden emakumeei zuzentzen zaie. Pertsona horiei urtebetez egingo zaie jarraipena, lehen hilabetetik aurrera tarteko analisiak eginez.

Ez dakigu egun dauden bi txerto moten (bektore gisa adenobirusa dutenen eta RNA mezularia dutenen) immunitate-erantzuna antzekoa edo desberdina den. Orain arte, saiakuntzetan zein txertaketetan, dosi batean (Janssen) edo bitan (AstraZeneca, Pfizer eta Moderna) egin dira. Bi dosi ematearen arrazoia izan da lehenengo dosiarekin immunitate-erantzuna aktibatu ondoren, bigarren dosiaren bidez, erantzun hori handitzea. Ildo horretatik, saiakuntza klinikoari esker, txertoen konbinazioaren inguruan dauden zalantzei erantzungo dieten datu zientifikoak lortu nahi dira, eta, horrez gain, AstraZenecaren lehen dosia jaso duten pertsonentzako estrategia eraginkorra zehaztu nahi da.

Saiakuntza horretan parte hartzearekin euskal osasun-sistemari laguntza- eta ikerketa-mailan duen gaitasuna aitortzen zaio, baita COVIDaren txertaketaren arloan duen esperientzia ere, CureVac txertoaren azterketaren emaitzen ondoren; izatez, Euskal Autonomia Erkidegoa izan zen ikerketa horretan pazienteak azkarren sartu zituen Europako zentroetako bat’.

Biocruces Bizkaia saiakuntza horretan sartzeak islatzen du Eusko Jaurlaritzako Osasun Sailak bio-osasunaren arloan egin duen apustua, eta hori guztia Osakidetzako, BIOEFeko eta Osasun Ikerketako Institutuetako Zerbitzu Erakundeetako pertsonen lanari esker lortu da.