Ebakuntzaren ostean behar bezala indarberritu eta balizko konplikazioak saihesteko, honako jarraibide hauek gomendatzen dizkizugu:

  • Has zaitez zure eguneroko bizitza pixkanaka egiten.
  • Ez egin ahalegin eta kirol bortitzik.
  • Izan eguneroko higiene pertsonal ona, zauria lehor mantenduz. Dutxatu zaitezke.
  • Edan likido asko, 2-3 litro ur egunean.
  • Jarraitu urologoak emandako tratamendua.

Ebakuntzaren ondoren, normala da honako sintoma hauek izatea:

  • Aldaketak gernuaren kolorean (ohi baino ilunagoa).
  • Mina sentitzea zauri kirurgikoaren edo uretraren eremuan.
  • Maskuri-espasmoak (zundak edo zundaren buxadurak eragindako maskuri-uzkurdura mingarriak). Zalantzarik baduzu, zure familia-medikuarekin kontsultatzeko gomendatzen dizugu.
  • Gernu-inkontinentzia, zunda kendu ostean.

Ospitaleko Larrialdi Zerbitzura joan behar duzu honako sintoma hauetakoren bat baduzu:

  • Sukarra (38ºC edo gehiago).
  • Zorne-jarioa zaurian.
  • Zauri kirurgikotik odola ateratzea, eta jarioa ez etetea zenbait minutuz presioa egin ostean.
  • Gernuan odola egotea (kolore gorri bizia).

Maskuri-zundaren zainketak etxean

Gernu-zunda plastikozko edo go- mazko hodi biguna da, uretraren bidez maskurian txertatzen dena, gernua kanporatzeko. Globo bat du puntan eta hori puztu egiten da maskuriaren barruan; hala, zunda finko mantentzen da eta ez da eror- tzen. Ez egin tira zundari; atera egin daiteke edo min har dezakezu.

Maskuri-zunda jarrita izatea ez da eragozpena bizitza soziala, familia-bizitza eta aisialdia normaltasunez uztartzen jarraitzeko.

Zunda eta poltsa behar bezala mantentzeko beharrezko materiala os- pitaleko altarekin batera emango dizute. Ondoren, zure osasun-zen- troan emango dizute.

Gomendioak:

  • Egunean zehar, zundak bolumen txikiko hankako poltsan egon behar du konektatuta; poltsa hori zinta batzuen bidez hankara eutsita egongo da.
  • Gauean, komeni da zunda oheko poltsara konektatzea (bolumen handiagoa du), poltsa husteko jaiki beharrik ez izateko.
  • Gernu-poltsak beti egon behar du maskuria baino beherago, gernu-fluxua maskurirantz itzultzea saihesteko.
  • Egiaztatu poltsa zundara ondo konektatuta dagoela, gernu-ihesak saihesteko.
  • Zaindu zundaren edo poltsaren hodiak tolestuta ez egotea, gernua poltsarantz igarotzea ez oztopatzeko.
  • Edan likido ugari (egunean 2-3 litro), gernu asko egon dadin eta maskurian zunda buxa lezaketen hondakinak sor daitezen eragozteko. Hobe da ura edatea, baina zukuak, salda, infusioak eta abar ere edan ditzakezu.

Higienea:

  • Gernu-poltsa egunero aldatu behar da.
  • Zunda edo poltsa maneiatu aurretik, eskuak xaboi eta urarekin garbitu behar dituzu, infekzioak saihesteko.
  • Drainatzeko gailua komunean hustu behar da 8 ordutik behin, gutxienez, edo beteta dagoenean.
  • Egunero garbitu behar dira zakila eta genitalak ur eta xaboiarekin, zundaren inguruan ez dadin «lohitasunik» sortu, eta infekzioak saihesteko. Dutxa zaitezke, tapoia erabiliz.