Ez zaituzte ospitaleratuko infekzio aktiborik baduzu. Ospitaleratzea programatzeko dei bat jasoko duzu, eta COVID proba egin beharko duzu. Une horretan sintoma infekziosoren bat baduzu (katarroa, eztula, mina pixa egitean, beherakoa, mukiak, sukarra…), jakinarazi egin beharko duzu, eta ospitaleratzea osasun-arazoa konpondu denerako birprogramatuko da.
Ospitaleratze-egunean, goizeko 8:00etan ospitaleko harrera-zerbitzura joan beharko zara, ospitaleko hallean (ospitaleko planoko 1. eremua), NAN eta OTIarekin.
Ospitaleratze-izapidea egin ondoren, emandako dokumentuekin joan beharko zara Hematologiako ospitalizazio-unitatera (1. solairua, E gunea, ospitale-planoko 8. eremua), eta erizaintzako kontrolean jakinarazi. Une horretan, zerbitzuko profesional batek zure gelara lagunduko zaitu, eta ospitaleratuta zauden bitartean jarraitu beharreko funtzionamendua eta arauak azalduko dizkizu.
Lehen egunean, zainetako sarbide bat (PICC) ez edukiz gero, hura jarriko dizute.
Transplantea egiteko ospitaleratzeak lau aste iraungo du, gutxi gorabehera. Gela indibidual batean egongo zara, eta isolamendu-neurriak hartuko dira prozesuaren zati handi batean. Ezingo zara gelatik atera, ezta leihoak ireki ere, infekzioak hartzeko arriskua murrizteko. Horrek estres emozional handiko uneak eragin ditzake; behar izanez gero, ez izan zalantzarik laguntza psikologikoa eskatzeko.
Transplantea ondo joatearen zati handi bat taldeak emandako gomendioak behar bezala betetzean datza. Transplanteak irauten duen bitartean, immunitate-sistemak emandako kimioterapiako farmakoen ondorioen eragin handia pairatuko du; horregatik, isolamendu-neurriak zorrotz bete behar dira, bai pazienteentzat, bai laguntzaileentzat ezarritakoak.
Ospitaleratuta zauden bitartean, entretenimendua izan ahalko duzu (liburuak, tabletak, irratia…), baina gelan objekturik ez pilatzeko eskatuko dizugu. Garbitzaileak ez dira pazientearen eta laguntzaileen objektu pertsonalak garbitzeaz arduratuko.
Era berean, zeure burua garbitzeko gauzak ekarri beharko dituzu (hortzetako eskuila, bizar-aitzurrak, krema hidratatzaileak…).
Landare naturalak eta loreak DEBEKATUTA daude, baita ospitale barruan maskotak egotea ere.
Ospitaleak lotarako arropa (kamisoia) eman diezazuke, baina zeurea ekar dezakezu, betiere zabala eta erosoa bada eta serumen bidez medikazioa emateko egokia bada. Serum bat konektatua izango duzu eguneko 24 orduetan, eta arropek zainetako sarbideak erraz erabiltzeko aukera eman behar dute.
Ospitaleko janaria jan beharko duzu. Premia berezirik izanez gero, jakinarazi hematologiako langileei, eta dieta egoera klinikoaren arabera egokituko da.
Garrantzitsua da gelan ariketa fisikoa egitea. Ariketa fisikoa maiz egiteak susperraldi hobea eta etxerako buelta errazagoa izatea ahalbidetuko dizu. Galdetu horri buruz Hematologiako langileei.
Norbait zurekin egotea funtsezkoa da —ia nahitaezkoa ere—, batez ere ospitaleratzearen lehenengo 2-3 asteetan. Medikazio asko emango dizkizugu zain barnetik. Laguntza beharko duzu bai garbitzeko, bai gauez komunera joateko, eta laguntza eta konpainia transplantearen fase kritikoenetan. Aproposena egunean zehar bizpahiru pertsona txandakatzea da.
Bisita soziala kontraindikatuta dago, hau da, ospitalean zurekin egon ohi ez diren lagunek eta senideek ezingo dizute bisitatu. Arau horren helburua kanpoko infekzio batetik babestea da. Hala ere, bideodeiak egin ahal izango dituzu hurbilekoekin harremanetan egoteko.
Gurutzetako Unibertsitate Ospitaleak doako WiFia eskaintzen die ospitaleratutako pertsonei, eguneroko sarbidearen bidez, gailu elektronikoak eta komunikaziokoak erabiltzeko. Aprobetxatu lagunekin eta senideekin hitz egiteko (seme-alabak, bilobak…).
Isolamendu unitatean sartzea