Minbiziaren aurkako tratamendu askok, hala nola kimioterapiak eta erradioterapiak, eragina izan dezakete hortzetako eta ahoko osasunean.
Konplikazioen artean, honako hauek aipa daitezke: ahoko zauriak, ahoko odoljarioak, ahoko lehortasuna, txantxarrak, hortzoietako gaixotasuna, infekzioak, mina, irensteko zailtasuna eta dastamena aldatzea.
Kasu batzuetan, konplikazioak larriak direnean, tratamenduan ondorioak izan ditzakete:
- Baliteke tratamendu-dosiak murriztu behar izatea.
- Tratamendua atzeratu daiteke.
- Tratamendua eten daiteke.
Kimioterapia- edo erradioterapia-tratamenduaren aurretik
Minbizi-tratamenduaren aurretik eta tratamenduan zehar hortz-higiene ona izatea lagungarria izan daiteke ahoko konplikazioak prebenitzeko edo gutxitzeko.
Tratamendua premiazkoa ez bada, dentistara joan behar zara tratamendua hasi baino gutxienez lau aste lehenago. Aho-hortzetako arazoak tratamendua hasi aurretik tratatzea da helburua.
Tratamenduaren aurretik ahoa aztertzearen bidez, honako arazo hauek identifika daitezke: txantxarrak, hortz hautsiak, koroa edo enpaste solteak edo hortzetako gaixotasunak. Arazo horiek tratamendua hasi aurretik tratatzen badira, baliteke aho-konplikazio gutxiago izatea edo hain larriak ez izatea.
Hala ere, batzuetan, kimioterapia-tratamenduaren hasiera ezin dugu atzeratu, eta beraz ez dugu konprometitu behar.
Minbizi-tratamenduan zehar
Tratamenduan zehar txantxarrak, zauriak eta infekzioak izateko arriskua murrizteko, garrantzitsua da ahoa, hortzak eta hortzoiak garbi edukitzea.
Honako neurri hauek har ditzakezu aho-hortzen osasuna hobetzen laguntzeko:
- Hortzak eta hortzoiak egunean hiru aldiz garbitu.
- Erabili zapore atsegineko hortzetako pasta fluorduna.
- Erabili hortzetako haria egunean behin, leunki.
- Otorduen ondoren, garbitu ahoa urarekin, gatzarekin eta sodio bikarbonatoarekin, mina prebenitzeko.
- Hortzordeak gomendatutako hortz-garbitzaile batekin egunero garbitu eta heze mantendu hortzak jarrita ez dituzunean.
- Hitz egin medikuekin hezur-osasuna hobetzeko moduei buruz, D bitaminaren eta/edo kaltzioaren osagarrien bidez.