Izpiak jardunaldiaren beste saio bat egin da ospitaleko ekitaldi-aretoan, eta oraingoan hizpide izan dira Osakidetzak pazienteekin erabiltzeko eskuragarri dituen informazio- eta komunikazio-tresnak. Besteak beste, honako hauek izan dira ekitaldiko parte-hartzaileak: Félix López Bernardos (Dokumentazio, Artxibo eta Kudeaketaren Kontrola Atal Sanitarioko burua), eta Susana Castelo Zas (Antolakuntzako goi-mailako teknikaria).
Osasun-langileen eta pazienteen arteko komunikazioa hobetze aldera ezarritako irtenbide digital ugari aurkeztu dira saioan. Tresna nagusien artean hauexek dira nabarmentzekoak:
- Osasun Karpeta: Horren bidez, pazientearentzako mezuak bidali daitezke, episodio klinikoei lotutako zalantzak argitu daitezke, eta eguneroko pertsonala erabili daiteke, zeinaren informazioa historia klinikoan jasota geratzen baita. Azpimarratu da garrantzitsua dela pazientearen helbide elektronikoa behar bezala gordeta egotea, aukera horiek egoki funtzionatu dezaten.
- Erabilera-gidak eta eskuliburuak: SharePoint korporatiboan daude eskuragarri, eta tresna bakoitzari buruzko jarraibide zehatzak jaso dira, historia klinikora irudiak igotzeko nahiz argazkilari klinikoa erabiltzeko argibideak barne.
- Bideokontsulta: Urrutiko arreta eskaintzea ahalbidetzen du, agendatik aurretiko hitzordua eskatu ondoren, osasun-arretaren irisgarritasuna nahiz eraginkortasuna hobetzeko.
- Irudigune eta Irudigiltza: Irudi klinikoak kudeatzeko tresnak. Jakinarazi da markatzeko sistema desagertzen joango dela, irtenbide aurreratuagoak ezarriko baitira horren ordez.
Horrez gain, kontsultak digitalizatzen ari dira tabletei esker; hala, tabletek paperezko inkesta tradizionalak ordezten dituzte, eta historia klinikoan zuzenean informazioa sartzea ahalbidetzen dute. Halaber, beste baliabide batzuk aurkeztu dira, hala nola:
- Infopaziente: Dokubideri lotutako plataforma, pazienteak informazio garrantzitsua eskuratu ahal dezan.
- SMS bidezko gogorarazpenak: Kontsultak prestatzeko eta asistentzia hobetzeko abisu-sistema.
- Gurutzeta Kanala: Ospitaleko logeletako telebistetara mezuak bidaltzen dituen komunikazio-kanala.
- Web atariak: eSano, Osasun Eskola+ eta Paziente Bizia, online ikastaroez gain historia klinikotik preskribatzeko aukera eskaintzen dutenak.
Jardunaldia amaitutakoan, laburpen hau eman zaie, honako hauek adierazita: tresna bakoitzaren izena eta baliagarritasuna; erabiltzeko jarraibideak; eta zalantzak argitu ditzaketen eta informazio gehiago eman dezaketen ESIko erreferenteen harremanetarako datuak.
Ekimen honen bidez, berretsi da Osakidetzak pazienteen arretan izan nahi duen etengabeko hobekuntzarekiko eta berrikuntzarekiko konpromisoa, betiere informazio sanitarioaren digitalizazioaren eta irisgarritasunaren alde eginez.
