Gurutzetako Unibertsitate Ospitalean beste Berripill saio bat egin da Óscar Guadilla Jiménezen eskutik, EJIE-Eusko Jaurlaritzaren Informatika Elkarteko Berrikuntza arduraduna, izenburu honen pean “Prospekzio teknologikotik berrikuntzara, kudeaketa-ikuspegitik. Ez da zorte-kontua”.
Saio horretan, hizlariak EJIEren berrikuntza-eredua aurkeztu du, zeinak honako hauek baititu oinarritzat: zaintza teknologikoa, irtenbide berrien ebaluazio sistematikoa eta urtero gutxienez proiektu berritzaile bat ezartzeko helburua. Horrez gain, azaldu ditu prozesu hori hamarkada batez kudeatzen egon ostean lortutako irakaspen nagusiak.
Ikus-entzuleek gai horretan zeukaten interesa dela-eta, atal berezi bat eskaini diete Osakidetzako langileek eguneroko jardunean erabili ditzaketen tresnei; besteak beste, hauexek aipatu dituzte:
- bakQ, identifikazio digitaleko sistema.
- NIK – Patrika digitala, zeinak hilero 130.000 erabiltzaile baino gehiago baititu.
- Itzuli, Eusko Jaurlaritzaren itzultzaile neuronala, astero 1,5 milioi itzulpen baino gehiago dituena.
- HABEren online ikastaroa, euskara ikasteko.
Horrez gain, EJIEk garatutako proiektu berritzaileen adibideak eman dira saioan, arrakastatsuak izan direnak nahiz irakaspenak ateratzeko balio izan dutenak.
