Gaur, 09: 39an Ezkerralde Enkarterri Gurutzetako ESIa bere profesionalei COVID-19aren aurkako txertoa jartzen hasi da. Lehen dosiak ospitalean bertan jarri zaizkie Gurutzetako, Bilbo-Basurtuko eta Uribeko ESIetako lehen lerroko profesionalei. Aurreikuspenen arabera, datozen egunetan txertaketak jarraituko du Osakidetzako gainerako erakundeetan, Moderna txertotik jasotako dosien erdiarekin, hau da, 700 dosirekin.

Talde horren txertaketak pixkanaka eta mailaka jarraituko du, txertoen dosien eskuragarritasunaren arabera, bai Modernaren bai Pfizerren kasuan. Txertaketa hori adinekoen egoitzetako txertaketa-prozesuarekin batera egingo da, bai egoiliarrei, bai profesionalei.

Osasun Sailak eta Osakidetzak gogorarazi dute txertoak ez duela inolako erlaxaziorik ekarri behar. Zentzu horretan, kutsatzea saihesteko ohiko prebentzio-neurriak gogorarazten dira: distantzia soziala, kontaktuen burbuila mantentzea, eskuen higienea, maskara erabiltzea eta espazio itxiak aireztatzea.