“Pazienteen hizkuntza-aukera bermatzen” izeneko ikastaroa jarri berri da martxan Ezkerralde eta Enkarterrietako 5 osasun-zentrotan: Kabiezes-Santurtzi, Buenavista-Portugalete, Ortuella, Trapagaran eta Zalla. Eta zabaltzen jarraitzeko asmoa dago.
Ikastaroak 28 ordu inguru ditu, martxotik ekainera, eta astean behingo 2 orduko saiotan banatzen da, betiere, osasun-zentroen beharretara egokiturik.
Joan den abenduan, trebakuntza zentroan bertan jasotzeko aukera eskaini zien Euskara Zerbitzuak, eta erantzuna oso positiboa izan da. Izan ere, lanbide-kategoria guztietako 58 profesional animatu dira parte hartzen; batez beste, 14 lagun zentro bakoitzeko.
Gainera, prestakuntza-jarduera hori pazienteen hizkuntza-aukera erregistratzeko Osakidetzak zabaldutako kanpainari lotu nahi zaio, hain zuzen ere, datozen erronkei behar bezala erantzun ahal izateko.
Horrela, ikastaroen helburuak dira osasun-zentroan arreta euskaraz egitea; profesionalek euren eguneroko jardueretan, hizkuntza zuzen eta argi erabiltzeko gaitasuna edukitzea, lanerako baliagarriak zaizkien tresnak eskuragarri izatea eta, azkenik, hizkuntzak erabiltzeko EEC ESIaren irizpideak ezagutzea.
Irudian Kabiezeseko Osasun Zentroko langileak
